Një infermiere në fshatin Ballaban dyshohet se është infektuar me koronavirus.
Kjo e fundit ka takuar një italian, i cili sapo ishte kthyer nga shteti fqinj, i cili dyshohet gjithashtu se ishte prekur nga virusi.
Infermieres i janë marrë mostrat tek shërbimi i patologjisë në spitalin e Gjirokastrës, “Omer Nishani”, shkruan “Dosja.al”.
Aktualisht në vendin tonë numri i të prekurve nga koronavirusi është 10, ndërsa janë marrë 114 mostra.
Më e rëndë situata është për të moshuarën nga Durrësi, e cila ndodhet në reanimacion, pasi vuan nga sëmundje kronike.
Pacienti zero në Shqipëri është një 28-vjeçar nga Puka, i cili u kthye nga Firenze më 26 shkurt nëpërmjet pikës kufitare të Hanit të Hotit.
Ai infektoi babanë dhe tre të afërm të tij, të cilët tashmë ndodhen te Infektivi në QSUT.
Që prej të hënës, qeveria ka marrë një sërë masash për parandalimin e përhapjes së virusit, duke mbyllur shkollat dhe anuluar aktivitetet publike.
Gjithashtu që prej mbrëmjes së djeshme ka nisur aksioni për mbylljen e lokaleve.
Në disa prej qyteteve të vendit, punëtorët e bashkive kanë nisur dezinfektimin e ambjenteve publike.
