Mbrëmjen e djeshme ka qarkulluar një video ku shfaqej nënkryetarja serbe në komunën e Leposaviqit, Dragana Miletiq duke konsumuar kokainë brenda ambienteve të komunës, bashkë me një pjesë të stafit.
Videoja është publikuar nga media kosovare, “Nacionale” dhe u shpërnda gjerësisht në rrjet.
Lidhur me këtë video ka reaguar sot Prokuroria Themelore në Mitrovicë, e cila përmes një deklarate publike ka shprehur se do të hetojë këtë rast.
”Prokuroria Themelore në Mitrovicë njofton opinionin se përkitazi me publikimin e video incizimit të portalit Nacionale, publikuar me datë 29 janar 2024, me qëllim të ndriçimit të gjitha fakteve dhe rrethanave, ka autorizuar Policinë e Kosovës – Drejtorinë për Hetimin e Trafikimit me Narkotikë (DHTN) në Prishtinë, që të ndërmarrë të gjitha veprimet hetimore lidhur me hetimin e këtij rasti, që ka të bëjë me persona të përfshirë që shihen në videot e publikuara, përfshirë identifikimin e të gjithë personave, pastaj mbledhjen e provave – video incizimeve të portalit Nacionale, dhe provave tjera relevante që janë të nevojshme për hetimin dhe ndriçimin e këtij rasti, në drejtim të veprës penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge” nga neni 267 lidhur me nenin 275 paragrafi 1 pika 1.2 të Kodit Penal të Republikës së Kosovës”– thuhet në njoftim.
Pritet që të ketë detaje të reja lidhur me këtë ngjarje, ndërkohë vetë nënkryetarja është shprehur se nuk ka folur direkt për përmbajtjen, por e ka akuzuar Listën Serbe.
“Të rreme. Të gjitha këto janë të shpikura prej qytetarësh të Listës Serbe për të kërcënuar emrin dhe pozitën time në Komunë (të Leposaviqit), si dhe punëtorët në Komunë të Leposaviqit”, ka thënë nënkryetarja e Leposaviqit.
Lidhur me këtë ngjarje ka reaguar edhe kryetari i Leposaviqit, Lulzim Hetemi, i cili ka shkarkuar nga detyra nënkryetaren e komunës, Dragana Miletiq.
“Shkarkimi nga detyra e nënkryetares sipas nenit 1 të këtij vendimi, bëhet për shkak të shkeljeve të rënda të punës dhe mosrespektimit të pozitës së saj si nënkryetare dhe mos përmbushjes së detyrave të punës”, thuhet në vendim e nënshkruar nga kryetari Hetemi.
