Ish-kryeministri Sali Berisha ka komentuar për herë të parë listat e partisë Demokratike në këto zgjedhje dhe pozicionimin e tij në vendin e pestë në qarkun e Tiranës.. Në Neës 24 ai ka thënë se nuk do të kishte asnjë keqardhje edhe po të ishte më poshtë. Ai tha se e konsideron veten si një prej deputetëve të PD që garon për t’u future në Parlament, ndryshe nga figura të njohura të PS që u renditën poshtë në lista për t’u eliminuar.
“Do doja të isha pak më mbrapa, kanë bërë atë renditje, por edhe po të isha më poshtë, nuk do të kisha asnjë keqardhje. Jo në formën që ka përdorur Rama, se ajo që ka përdorur z.Rama është thikë pas shpine. Mendoni ju se Xhafaj do mund të hyjë në Parlament në pozicionin e 23? Unë e konsideroj veten njërin prej deputetëve të PD, që garon për t’u futur në Parlament. Ata e dinë se partia i vuri në këto pozicione për t’i eliminuar dhe janë të eliminuar”, ka thënë Berisha.
Ai po ashtu ka komentuar listën e Partisë Socialiste duke thënë se ka përfshirë figura të krimit. Berisha ka kritikuar edhe fushatën e Ramës ku ai tentoi të denigronte figurën e disa prej zonjave të PD, mes tyre edhe Grida Duma. Ndër të tjera ish-kryeministri ka thënë se rama vendosi Najada Çomon në lista vetëm për të bindur socialistët se kanë pasur sukses me menaxhimin e pandemisë.
“Lista e PS ka tre veçanti, e para është avancimi në pozicionet më të sigurta të krimit, drogës dhe korrupsionit, së dyti eliminimi i socialistëve që pas humbjes së zgjedhjeve janë rrezik i vërtetë për kryetarin e PS, dhe së treti vendosja në ballë të zonjave, nuk di kryeministër në botë që të hapë fushatën siç bëri ai dje ndaj z.Grida Duma. Ka zgjedhur dhe ca elementë të tjerë, që nuk do të votojnë kundër tij për largimin e tij si kryetar i PS. Mjeken e solli vetëm për të bindur socialistët se Covid-i ishte një sukses, në një kohë kur Covid-i ishte drama më e madhe e një vendi sot në Shqipëri”, tha Berisha.
