Specializantët e mjekësisë kanë zhvilluar ditën e sotme një protestë para Ministrisë së Shëndetësisë. Kjo protestë e tyre, ka ardhur për shkak se pas një viti shërbimi kundër pandemisë “Covid-19”, një mijë mjekë specializantë janë hequr nga puna.
Një nga mjeket specializantë, u shpreh se me këtë vendim të marrë, atyre u është ndalur punësimi në strukturat private, si dhe në ato shtetërore.
Ndërsa kërkuan takim me Ministren e Shëndetësisë Ogerta Manastirliu, ata paralajmëruan se nëse çështja nuk merr zgjidhje, atëherë do t’i drejtohen Gjykatës. “Kërkojmë takim me Ministren e Shëndetësisë. Kjo shkresë ka vend për t’u parë dhe për t’u anuluar.
Me këtë vendim na kanë ndaluar punësimin edhe në strukturën privatë dhe në atë shtetërore. Ne jemi rreth 1000 persona, ndërsa 700-800 mund të mbeten pa punë. Hapin e parë e nisëm me një shkresë, për këtë problem që na prek të gjithëve, por nëse do të na duhet do të shkojmë në proces gjyqësor”, u shpreh një mjeke specilizante.
Kujtojmë se vendimin e ka lëshuar Operatori i Shërbimeve të Kujdesit Shëndetësor (OSHKSH), ku theksohet ndërprerja e kontratës së punësimit me mjekët specializantë, pas kërkesës së bërë nga Ministria e Shëndetësisë. Pritet shumë shpejt edhe përgjigja e ministres Ogerta Manastirliu, në lidhje me kërkesat e mjekëve.
