Një 21-vjeçar është vënë në pranga nga Policia e Tiranës, pas dyshimeve se ka mashtruar disa qytetarë duke përdorur identitete të rreme për të përfituar para. I arrestuari është identifikuar si Erjon Hoxha, banues në Paskuqan.
Sipas njoftimit zyrtar, i riu u kap në flagrancë në momentin që po i merrte një shumë parash një 26-vjeçareje, e cila e kishte kallëzuar më parë në polici për mashtrim të përsëritur.
Hetimet e nisura pas denoncimit zbuluan se Hoxha kishte përdorur një emër dhe një profil të rremë për të fituar besimin e saj dhe për t’i marrë disa shuma parash në raste të ndryshme.
Për kapjen e tij, Policia organizoi operacionin e koduar “Strategjia”, i cili çoi në ndalimin e të dyshuarit pikërisht në çastin që po përpiqej të përfitonte një shumë tjetër nga e njëjta shtetase.
Autoritetet kanë nisur hetime të mëtejshme për të zbuluar nëse 21-vjeçari ka qenë i përfshirë edhe në raste të tjera të ngjashme mashtrimi me të njëjtën metodë.
