Tregtarët e tregut të Zdrales janë ngritur në protestë gjatë ditës së sotme.
Ata kërkojnë që t’u gjendet një hapësirë për të zhvilluar aktivitetin, pasi tregu është mbyllur që më 14 prill.
Njëra nga tregtaret shprehet për “Report Tv”, se nuk ka pasur mundësi që të ushqejë fëmijët për shkak se nuk ka të ardhura të tjera përveç punës në treg.
“Kam marrë numrin e telefonit e vendosur te Bashkia dhe më del nuk ekziston. Unë e kam marrë e shkreta, për t’ia qarë hallin se të thashë 4 fëmijë, burrë e grua dhe 2 pleq…më qan fëmija, më qan plaku”, tha qytetarja.
Një tjetër tregtar shprehet, se autoritetet duhet t’i kishin lajmëruar dy ditë përpara, pasi kanë marrë 400-500 mijë lekë mall, i cili u është prishur.
“Jam një tregtar vogël, që duam një zgjidhje, prodhoj, prodhoj, po ku t’i çojmë. Kam ndjekur në shtëpi gjithë këto ditë. Jam dakord kudo që të na vendosë Bashkia dhe për tarifës, por të mos na vendosin shqelmin. Kemi marrë 400-500 mijë lekë mall, të na lajmëronit të paktën përpara nja 2 ditë, të mos merrnim të paktën furnizim. U prish malli në makinë. Nuk përfitoj nga paketa, jam tregtar i lirë. Dua të na caktojnë vendin”, tha ai.
Kujtojmë këtu se në protestë para pak ditësh janë ngritur edhe tregtarët e tregut të orizit në Vlorë, pasi kanë mbetur pa të ardhura, si pasojë e mbylljes së aktivitetit.
