Gazetari i njohur amerikan Terry Anderson, i cili u mbajt si peng për rreth shtatë vite gjatë konfliktit civil në Liban, ka vdekur në moshën 76 vjeç. Anderson ishte korrespondenti i parë për Lindjen e Mesme i Associated Press kur u rrëmbye nga militantët islamikë në 1985, ngjarje kjo që përfshihet në krizën e pengjeve të Libanit. Vdekja e tij ndodhi në rezidencën e tij në Greenwood Lake, Nju Jork, të dielën, siç njoftoi vajza e tij. Ajo theksoi se edhe pse i ati vuajti shumë gjatë kohës që ishte peng, ai arriti të gjejë qetësi në vitet e tij të fundit dhe shtoi se ai kurrë nuk pranoi etiketën e heroit, edhe pse shumë të tjerë e quanin të tillë. Louis Boccardi, president i Associated Press gjatë kohës së robërisë së Andersonit, e kujtoi atë si një “hero”. Anderson u rrëmbye në Bejrut më 16 mars 1985, menjëherë pas një ndeshje tenisi, dhe kaloi pothuajse shtatë vjet në një qeli nëntokësore, i zinxhiruar dhe me sy të lidhur. Motra e tij, Peggy Say, e cila vdiq në 2015, luftoi për lirimin e tij dhe të bashkërobërve. Ai u lirua në 1991, pas përfundimit të luftës civile dhe më pas e takoi vajzën e tij për herë të parë, e cila ishte gjashtë vjeç në atë kohë. Pas lirimit, Anderson mësoi gazetarinë në disa universitete amerikane, duke përfshirë Universitetin e Kolumbias, dhe shkroi një autobiografi titulluar “Den of Lions”, ku përshkroi periudhën e tij si peng.
“Janë bërë pagesa pa kryer shërbime!” Skandali i hemodializës zbërthen aferën e Klodian Allajbeut, KLSH të auditojë kontratën 10-vjeçare!
Në Kuvendin e Shqipërisë është rikthyer në qendër të debatit një prej aferave më të rënda të dekadës së fundit:...
