Këshilli i Lartë Gjyqësor (KLGJ) ka marrë në mbrojtje gjyqtaren e Gjykatës së Apelit në Tiranë, Arnisa Këlliçi.
Javën që lamë pas ajo njoftoi se kishte marrë një letër kërcënuese nga persona të paidentifikuar, të cilët kërcënonin me jetë atë dhe famijarët e saj.
“E dashur Arnisa.
Keni dy djem ….. dhe ….. Mendoni për ta! Si mund të rroni ju, e jo ata e kjo është e vërtetë. Me respekt”, thuhet në letër.
KLGJ ka vendosur që për 3 muaj ajo të jetë në ruajtjen e Gardës së Republikës dhe të Policisë së Shtetit, me të drejtë rishikimi në fund të këtij afati.
Mirëpo dyshohet se ky kërcënim mund t’i ketë ardhur pas një kallëzimi që kancelari i Gjykatës së Tiranës ka bërë në prokurori për një prokuror. Vetë gjyqtarja shprehet se nuk mund të vërtetojë vërtetësinë e letrës, por kërkoi të merren masa.
“Para pak ditësh më është bërë me dije nga Kancelari i kësaj Gjykate që kundrejt meje, gjyqtares Amisa Këlliçi, ka patur një kërcënim me jetë.
Për këtë fakt unë nuk kam prova, por më është bërë me dije se ka një kallëzim të depozituar nga ana e Kancelarit të Gjykatës së Shkallës së Parë të Juridiksionit të Përgjithshëm Tiranë.
Sot më datë 20.01.2024, më ka ardhur një letër kërcënuese, që me aq sa mund të deshifroj përmban kërcënime për mua, fëmijët e mi dhe familjen time. Unë nuk mund të atestoj në asnjë moment për vërtetësinë e kësaj letre.
Thënë kjo, për çdo eventualitet, unë kërkoj një mbrojtje të posaçme, për aq sa ju e shihni të nevojshme”, thuhet në kërkesën drejtuar KLGJ.
