I afërmi i 65-vjeçarit që u hodh dje nga kati i katërt i Spitalit të Sanatoriumit, ka folur rreth gjendjes shëndetësore të Hasan Mirës, gjatë ditëve të fundit.
Shkëlqim Topollai ka thënë se 65-vjeçari Mira ishte infektuar katër ditë më parë dhe më pas ishte shtruar në spital vetëm dy ditë më parë për shkak të gjendjes së tij shëndetësore të përkeqësuar.
Sipas Topollait, 65-vjeçari kishte shfaqur shenja agresiviteti pas shtrimit në spital e për këtë arsye stafi mjekësor e kishte vendosur në një dhomë më vete.
Mësohet se Hasan Mira nuk ka pranuar që të mbante maskën e oksigjenit, ndërsa ka mbajtur gjatë kohës komunikime me vëllain e tij.
“Hasani kishte rreth katër ditë që vuante. Pas dy ditësh ishte rënduar situata e tij dhe vendosëm ta sjellim në spital.
Nga të dhënat që kemi ai është acaruar edhe ka qenë i çekuilibruar dhe i nerviozuar dhe nuk ka dashur të mbajë oksigjenin dhe ka qenë shumë i acaruar. E kanë dërguar në dhomë vetëm pasi ka shfaqur shenja dhune dhe agresiviteti, paqëndrueshmërie.
Nuk besoj se është çështje spitalore, por mbase nga paniku. Nuk e di a ka pasur telefon. Ka folur me të vëllain kur ka qenë i shtruar në spital. Nuk ka qenë i qetë fare.
Nuk vuante nga depresioni. Nuk është kuruar asnjëherë. Gjetan Gjetani ka komunikuar më shumë, se ne nuk kemi nga marrim informacion.
Këto m’i tha vëllai mua. Kur ka shkuar në spital ka qenë në një dhomë jo vetëm dhe ka shfaqur shenja agresiviteti. Për këtë arsye e kanë veçuar për të mos shqetësuar pacientët e tjerë. Ka qenë njeri i rregullt, ka pasur një biznes, ka qenë mirë mendërisht”, është shprehur i afërmi i viktimës.
Kujtojmë se Hasan Mira është pacienti i dytë me Covid-19, i cili u hodh nga dritarja e dhomës së spitalit të Sanatoriumit, pas 29-vjeçarit nga Durrësi.
65-vjeçari ishte vjehrri i deputetit të Kuvendit të Shqipërisë, Gjetan Gjetanit.
