Policia e Tiranës ka raportuar dy ngjarje të rënda, ku njëra ka përfshirë një 54-vjeçar që dyshohet se është hedhur nga kati i nëntë i pallatit ku banonte, ndërsa tjetra ka ndodhur kur një 42-vjeçar ka kërcënuar se do të hidhej nga Piramida e kryeqytetit.
Sipas informacioneve të policisë, ngjarja e parë ka ndodhur në rrugën “Hamdi Sulçebe”, ku shtetasi O. L., 54 vjeç, dyshohet se është vetëhedhur nga kati i nëntë i pallatit ku jetonte.
Ai u transportua menjëherë në spital dhe ndodhet aktualisht nën kujdesin e mjekëve, por ende nuk ka informacion mbi gjendjen e tij shëndetësore. Policia po punon për të sqaruar rrethanat e incidentit.
Në ngjarjen tjetër, një 42-vjeçar, shtetasi A. G., ka kërcënuar se do të hidhej nga lartësia e Piramidës, duke qenë në një gjendje të rënduar psikologjike. Pas negociatave të shërbimeve të Policisë, ai u zbrit dhe u transportua për ndihmë mjekësore.
Policia ka konfirmuar se ky shtetas është shpëtuar dhe aktualisht po merr ndihmën e nevojshme.
