Para disa ditësh një ngjarje tragjike u regjistrua në SHBA, ku 53 emigrantë u gjetën të vdekur brenda një kamioni.
Ndërkohë shoferi i kamionit në Teksas të SHBA brenda të cilit u gjetën 53 emigrantë të vdekur thotë se nuk e dinte që kondicioneri nuk punonte. Kështu është shprehur në hetuesi shoferi i kamionit, sipas burimeve të BBC.
Theksojmë se Homero Zamorano u gjet i fshehur në disa shkurre pranë kamionit. Ai është një nga katër personat e akuzuar për tragjedinë me 53 emigrantë të vdekur. Brenda në kamion kishte edhe fëmijë, të cilët kanë mbetur të plagosur dhe ndodhen në spital. Në fakt në momentin që u arrestua, drejtuesi i mjetit 45-vjeçar ka ‘luajtur’ para autoriteteve rolin e të mbijetuarit, por hetimet zbuluan se ai ishte shoferi dhe akuzohet si një nga personat e përfshirë në këtë rast të kontrabandës së emigrantëve.
Kujtojmë që pas ngjarjes shefi i zjarrfikëseve Charles Hood bëri me dije se nuk kishte ujë apo ajër të kondicionuar në kamionin ku vdiqën 53 emigrantët.
Brenda kamionit në total ndodheshin 64 emigrantë, teksa 53 humbën tragjikisht jetën, ndërsa mundën të shpëtonin 11 persona të tjerë. Të mbijetuarit përgjithësisht nuk paraqiteshin me problematika të rënda dhe u dërguan në spital për të marrë ndihmën e nevojshme mjekësore.
