Mesazhet e ngushëllimit kanë ndjekur njëra-tjetrën që prej ditës së djeshme u përhap lajmi se trupi i burrit të gjetur pa jetë ishte i avokatit Aineo Redo.
“Një njeri shumë i mirë, që u shpenzua pa rezerva për njerëzit në nevojë”, siç e kujtojnë kolegët dhe miqtë. Aineo Redo, avokati pothuajse 49-vjeçar me origjinë shqiptare, emigroi nga Shqipëria dhe mbërriti në Reggio me shumë sakrifica.
Mëngjesin e djeshëm trupi i tij u gjet nga një kalimtar nën galerinë e bankës BNL në Via Emilia Santo Stefano. Aineo Redo, Enea për miqtë, lë pas gruan dhe dy fëmijët, 9 dhe 18 vjeç.
Dje në Itali u gjet i vdekur, avokati i njohur shqiptar Aineo Redo nga Bulqiza. Duke folur për mediat italiane, avokati Mario Di Frenna, koleg me shqiptarin tha se Aineo ishte më tepër se koleg për të pasi ndanin një zyrë që prej vitit 2007 së bashku me avokatin Franco Beretti.
Aineo ishte i jashtëzakonshëm. Ai ishte një shembull i shkëlqyer për të gjithë ne. Ai ishte gjithashtu një mik për të ndarë pasionet me të, si futbolli, në ekipin e avokatëve ‘Duralex’ të Reggio-s. E kam parë Aineon për herë të fundit mbrëmë (e mërkurë), kur luajtëm një lojë. U përshëndetëm në orën 23.30. Ai më tha: Shihemi nesër në zyrë. Por në orën 10.50, kur mbërrita, ai nuk ishte. Pastaj më thirrën karabinierët…
Më pas ai ka treguar se ai ishte shumë i dashur për klientët e tij dhe shqiptarët pasi i kishte ndihmuar shumë.
