Policia e Durrësit ka konfirmuar zyrtarisht ngjarjen e ndodhur mbrëmjen e së martës, rreth orës 22:30, pranë zonës së “Velierës”, ku u zbulua një pako me lëndë të dyshuar shpërthyese.
Sipas njoftimit, paketa përmbante eksploziv dhe ishte e pajisur me një celular të ngjitur me natriban, çka ngriti dyshime për një mekanizëm të mundshëm shpërthyes.
Në vendngjarje u thirr menjëherë njësia antieksploziv e RENEA-s, e cila kreu ndërhyrjen teknike dhe realizoi shpërthimin e kontrolluar, duke çaktivizuar në mënyrë të sigurt lëndën plasëse.
Zona ku u gjet pakoja ndodhet pranë pallatit ku banon ish-kryebashkiaku i Durrësit, Vangjush Dako, por ende nuk dihen motivet apo objektivi i mundshëm i këtij veprimi.
Njoftimi i policisë:
Më datë 20.05.2025, rreth orës 22:30, në lagjen nr. 1, në vendin e quajtur “Veliera”, është konstatuar një pako me lëndë të dyshuar plasëse. Menjëherë pas marrjes së njoftimit, shërbimet e Policisë shkuan në adresën e dhënë dhe vendosën perimetrin e sigurisë, ndërsa njësia antieksploziv e RENEA-s kreu veprimet për çaktivizimin e pakos me lëndë plasëse që ishte lidhur me një celular të ngjitur me natriban.Grupi hetimor, në drejtimin e Prokurorisë, po punon për zbardhjen e rrethanave të rastit, identifikimin dhe kapjen e autorit/ve. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme”, thuhet në njoftimin e Policisë së Durrësit.
