Prokuroria në Prishtinë ka konfirmuar se Enver Bajraktari, trupi i të cilit u gjet i varrosur më 4 gusht në fshatin Baicë të Lipjanit, është vrarë me mjete të forta përpara se të groposet.
Lajmi është bërë i ditur nga burime pranë institucionit të akuzës, të cilat shtojnë se autopsia mbi trupin e viktimës tashmë është kryer, ndërsa hetimet po vijojnë me intensitet për të zbuluar autorin dhe motivin e krimit.
“Ju njoftojmë se me datë 05.08.2025 është bërë identifikimi i plotë i viktimës, që rezulton të jetë Enver Bajraktari. Është kryer autopsia dhe po zhvillohen hetime intensive. Megjithatë, për shkak të ndjeshmërisë së rastit, nuk mund të jepen detaje të tjera në këtë fazë,” thuhet në deklaratën zyrtare të Prokurorisë.
Mediat lokale raportojnë se trupi i Bajraktarit është gjetur i groposur në një arë të mbjellë me misër, rreth një kilometër larg banesës së tij.
Viktima dyshohet se është tërhequr zvarrë deri në vendin ku është groposur në një gropë rreth dy metra të thellë, çka ngre dyshime për një vrasje të organizuar dhe të kryer me qëllim fshehjen e gjurmëve.
