Presidenti Ilir Meta ka nderuar ditën e sotme me Titullin e lartë “Për Merita të Veçanta Civile”, mjekun Grei Malo.
Ky i fundit zbriti menjëherë në terren pas tërmetit të 26 nëntorit dhe u fut nën rrënoja.
Malo spikati në operacionin për shpëtimin e të riut Klajdi Qato, i cili mbeti i bllokuar në rrënojat e “Vila Palma”.
Kreu i shtetit u ka shprehur mirënjohje të gjithë anëtarëve të Qendrës Vullnetare të Emergjencave Civile, për sakrificën dhe profesionalizmin.
Postimi i Metës
Me nderim dhe mirënjohje të thellë, pata sot privilegjin të vlerësoja me Titullin e lartë “Për Merita të Veçanta Civile”, mjekun hero Grei Malo, i cili zbriti në terren menjëherë pas goditjes së tërmetit tragjik të 26 nëntorit, duke hyrë nën rrënoja e shpëtuar jetë njerëzish në të gjitha zonat e dëmtuara, dhe spikati me kontributin e tij të veçantë humanitar si anëtar i Qendrës Vullnetare të Emergjencave Civile, për shpëtimin e të riut Klajdi Qato.
Mirënjohje Grei Malos që dha një shembull të jashtëzakonshëm të sakrificës dhe profesionalizmit, duke na bërë krenarë dhe gëzuar respektin e të gjithë shqiptarëve!
Mirënjohje të gjithë anëtarëve të Qendrës Vullnetare të Emergjencave Civile!
