GJKKO ka vendosur të mbajë në fuqi masën e sigurisë “arrest në burg” për Edison Mucekun, i cili akuzohet për sigurimin e kushteve për të kryer një vrasje në dëm të Hamza Terziut, ngjarje e ndodhur në maj të vitit 2020 në Bulqizë.
Muceku, i cili u ekstradua nga Mbretëria e Bashkuar pas arrestimit në janar të këtij viti, ka mohuar akuzat në sallën e gjyqit.
Ai ishte një nga 50 personat e arrestuar në kuadër të një operacioni të madh të SPAK, i cili synonte goditjen e grupeve kriminale.
Sipas hetimeve, Muceku dyshohet se është pjesë e një grupi kriminal të drejtuar nga Viktor (Tori) Xheçuka, të dy të akuzuar për organizimin e atentatit ndaj Terziut më 21 maj 2020.
Xheçuka, i cili dyshohet për vrasje me pagesë dhe ka qenë i përfshirë në disa atentate të zbuluara nga komunikimet në SKY ECC, raportohet se fshihet në Emiratet e Bashkuara Arabe.
Ndaj Mucekut rëndojnë akuzat për sigurimin e mjeteve për kryerjen e vrasjes, pjesëmarrje në grup të strukturuar kriminal dhe sigurim kushtesh për vrasje në bashkëpunim.
Ai kishte kërkuar që procesi i ekstradimit në Britani të ndërpritej, duke pretenduar se do të kthehej vullnetarisht në Shqipëri për t’u përballur me drejtësinë.
