Adriatik Rroshi, i cili u dhunua më 5 janar në kryeqytet, është pyetur nga efektivët e komisariatit numër 3.
Ai ka deklaruar se nuk ka njohur asnjë nga autorët e sulmit, pasi ata ishin të maskuar. Sipas Rroshit, ai nuk ka konflikte me askënd, ndërsa kur është pyetur për një ngjarje të mëparshme të ndodhur gjatë verës në Palasë, ai ka thënë se nuk mund të japë shpjegime.
Policia vijon hetimet dhe kërkon katër persona të përfshirë në sulm, ndër të cilët është edhe Tur Koçeku, i dyshuar si porositësi i sulmit ndaj Rroshit.
Policia ka arritur të kontaktojë autoritetet në Dubai, ku dyshohet se ndodhet Koçeku.
Adriatik Rroshi, 48 vjeç, vazhdon të jetë i shtruar në spitalin e Traumës, në gjendje stabile. Megjithatë, mjekët janë të kujdesshëm dhe nuk mund të konfirmojnë nëse ai ka kaluar rrezikun për jetën për shkak të dëmtimeve të shumta në trup.
