Detaje të reja kanë dalë në dritë pas shpërthimit të fuqishëm që ndodhi rreth orës 03:50 të mëngjesit në rrugën “Peti” në Tiranë, ku në shënjestër ishte vënë garazhi i 39-vjeçarit Elvis Kosova.
Lënda plasëse ishte vendosur në portën hyrëse të garazhit dhe si pasojë e shpërthimit janë dëmtuar katër automjete të parkuara pranë, ndërsa për fat të mirë nuk raportohet për persona të lënduar.
Elvis Kosova, i njohur ndryshe me nofkën “Visi i garave” për pasionin e tij për makinat e shpejta, nuk është një emër i panjohur për autoritetet.
Ai u arrestua në gusht të vitit 2024 për vjedhjen e një automjeti luksoz, një Audi R8 me vlerë rreth 200 mijë euro, në bashkëpunim me një shtetas turk. Megjithatë, ai u lirua pak ditë pas arrestimit dhe prej atëherë ka qenë nën vëzhgimin e autoriteteve.
Pas shpërthimit, grupi hetimor ka sekuestruar pamjet e kamerave të sigurisë në zonë dhe po punon për të identifikuar autorin.
Nga hetimet paraprake dyshohet se lënda plasëse është vendosur nga një person i maskuar, i cili më pas është larguar në këmbë nga vendi i ngjarjes.
Policia nuk përjashton pistën e hakmarrjes apo të konflikteve të mëparshme të Kosovës, edhe pse ky i fundit, sipas burimeve, ka deklaruar para hetuesve se nuk ka konflikte personale dhe nuk dyshon për asnjë individ.
