‘Dyluftimi’ Tufa-Braho vijon.
Ish-drejtori i Institutit të Studimeve të Krimeve dhe Pasojave të Komunizmit, Agron Tufa, ka shënjestruar sërisht deputetin e Partisë Socialiste, Spartak Braho, për të cilin ka ngritur sërish hije dyshimi se ka qenë proceduar në vitin ’80 nga Gjykata e Lartë.
Për Tufën, deputeti i PS-së, asokohe gjyqtar është proceduar nga Gjykata e Lartë për falsifikim të një dosje, por në mesazhin e tij i kërkon Brahos që të tregojë për publikun se si është mbyllur kjo çështje.
““Një pyetje “Moralistit” Spartak Ibrahim Braho
O lumëmadh që na shet “moral” edhe më shumë se klerikët, a mund të na përgjigjesh thjeshtë e bukur: A je proceduar si gjyqtar disiplinarisht në Gjykatën e Lartë në vitet ‘80 për ndonjë falsifikim dosjeje dhe si u mbyll ajo punë?”, thekson Tufa.
Debati mes Brahos e Tufës ka startuar që në prill.
Braho ka deklaruar se Tufa po nxin historinë, ndërkohe Tufa e ka akuzuar për shpifje.
Para disa ditësh ai publikoi disa dokumente, që vërtetojnë se Spartak Brahon ka firmosur dënimin me vdekje të minorenit Gjergj Hani gjatë periudhës së diktaturës.
Para disa muajsh, shkrimtari dhe ish-drejtori i Institutit për Krimet e Komunizmit, ka marrë kërcënime për vdekje.
Kjo bëri që Tufa të largohet në Zvicër, ku edhe ka kërkuar azil politik.
