Një deklaratë e papritur është publikuar nga presidenti amerikan Donald J. Trump në rrjetin e tij social, Truth Social, ku ai pretendon se Izraeli dhe Irani kanë rënë dakord për një armëpushim të plotë, i cili pritet të hyjë në fuqi brenda 6 orëve të ardhshme, pas përfundimit të operacioneve të fundit në terren.
Sipas Trump, marrëveshja parashikon që fillimisht Irani të ndalojë sulmin për një periudhë 12-orëshe, e pasuar nga Izraeli, ndërsa në përfundim të 24 orëve, konflikti, që ai e quan “Lufta 12-Ditore” do të konsiderohet zyrtarisht i mbyllur.
“Dua të përgëzoj të dyja palët, Izraelin dhe Iranin, për qëndrueshmërinë, guximin dhe inteligjencën për t’i dhënë fund kësaj lufte, e cila mund të kishte zgjatur për vite të tëra dhe të kishte shkatërruar të gjithë Lindjen e Mesme,” shkruan Trump në deklaratën e tij.
Ai shton se gjatë periudhës së armëpushimit, secila palë do të respektojë qetësinë, dhe nëse gjithçka shkon sipas planit, bota do të përshëndesë fundin e konfliktit.
Megjithatë, sipas raportimeve të BBC, Qeveria izraelite është shprehur e hapur ndaj propozimit të Trump, por ka paralajmëruar se do të “përgjigjet me forcë ndaj çdo shkeljeje të marrëveshjes”.
Nëse deklarata konfirmohet nga palët zyrtare, do të shënohej një hap historik drejt stabilizimit të Lindjes së Mesme, një rajon i përfshirë për dekada nga konflikte të përgjakshme.
