Presidenti amerikan Donald Trump ka reaguar për herë të parë pas takimit të zhvilluar dje në Alaska me Presidentin rus Vladimir Putin, duke e cilësuar bisedën si të suksesshme dhe të fokusuar tek arritja e një zgjidhjeje përfundimtare të luftës në Ukrainë.
Në një postim në platformën Truth, Trump bëri të ditur se pas takimit kishte zhvilluar edhe një bisedë telefonike me Presidentin ukrainas Volodymyr Zelenskyy, si dhe me disa udhëheqës europianë, përfshirë Sekretarin e Përgjithshëm të NATO-s.
“Takimi me Presidentin Vladimir Putin të Rusisë shkoi shumë mirë, ashtu si edhe një telefonatë vonë në mbrëmje me Presidentin Zelenskyy të Ukrainës, dhe me udhëheqës të ndryshëm europianë, përfshirë edhe Sekretarin e Përgjithshëm shumë të respektuar të NATO-s,” deklaroi Trump.
Ai theksoi se ishte arritur një konsensus i rëndësishëm mbi rrugën drejt paqes:
“U ra dakord nga të gjithë se mënyra më e mirë për t’i dhënë fund luftës së tmerrshme midis Rusisë dhe Ukrainës është arritja e një Marrëveshjeje Paqeje, e cila do ta përfundonte luftën, dhe jo thjesht një Marrëveshje Armëpushimi, e cila shpeshherë nuk zgjat.”
Sipas njoftimit të tij, Presidenti Zelenskyy do të vizitojë Shtëpinë e Bardhë të hënën pasdite për bisedime të mëtejshme, ndërsa nëse këto takime japin rezultat, do të planifikohet edhe një takim i ardhshëm me Presidentin Putin.
“Nëse gjithçka shkon mirë, atëherë do të planifikojmë një takim me Presidentin Putin. Potencialisht, miliona jetë njerëzish mund të shpëtohen,” theksoi Trump.
Në përfundim të reagimit, ai falënderoi publikun për vëmendjen ndaj kësaj çështjeje:
“Faleminderit për vëmendjen ndaj kësaj çështjeje!”
