Presidenti amerikan Donald Trump deklaroi se termi futboll i takon sportit më të popullarizuar globalisht, të cilin amerikanët vazhdojnë ta quajnë soccer. Gjatë pjesëmarrjes në shortin e Kupës së Botës në Uashington, ai kujtoi se që në fëmijëri ka qenë tifoz i futbollit dhe se mbart ende mbresa nga ndeshjet historike të legjendës braziliane Pele.
Në SHBA, futbolli amerikan është sporti që luhet me top vezak, i ngjashëm me regbinë. Por Trump theksoi se, bazuar te vetë kuptimi i fjalëve foot dhe ball, është logjike që termi futboll t’i përkasë sportit që luhet me këmbë.
“Mbaj mend kur isha fëmijë, kam parë ndeshjen e Pele, shënoi tre gola në atë ndeshje. Kur shohim se çfarë i ka ndodhur, dhe futbolli në SHBA quhet soccer, sepse kemi një tjetër sport që quhet futboll, por kur e mendon, a nuk duhet të quhet futboll? Ky është futboll, duhet të mendojmë një emër tjetër për NFL”, u shpreh Trump.
Deklarata e tij ringjalli edhe një herë debatin e vjetër mbi emërtimin e sporteve në SHBA, duke vendosur në qendër dallimin kulturor mes futbollit amerikan dhe atij që pjesa tjetër e botës e njeh thjesht si futboll.
