Presidenti i sapozgjedhur Donald Trump ka nënshkruar një marrëveshje me Shtëpinë e Bardhë për të lejuar ekipin e tij të tranzicionit të fillojë bashkëpunimin me agjencitë federale përpara marrjes së detyrës më 20 janar.
Marrëveshja është një hap kyç për të siguruar një transferim të rregullt të pushtetit dhe për të mundësuar qasjen ndaj të dhënave jo publike e detajeve kritike për sigurinë kombëtare.
Megjithatë, Trump nuk ka pranuar të nënshkruajë një marrëveshje të veçantë me Administratën e Shërbimeve të Përgjithshme (GSA), duke kufizuar përdorimin e zyrave dhe pajisjeve qeveritare të rezervuara për procesin e tranzicionit.
Ekipi i tij deklaroi se nuk do të pranojë donacione të huaja dhe do të publikojë emrat e donatorëve.
Marrëveshja pritet të ndihmojë në nisjen e procesit të vetingut dhe koordinimit për certifikatat e sigurisë, duke hapur rrugën për qasje në të dhëna sekrete për ekipin e ri qeveritar.
Shtëpia e Bardhë mbetet e përkushtuar për një tranzicion të qetë, duke theksuar rëndësinë e bashkëpunimit mes dy administratave.
