Presidenti amerikan Donald Trump ka kërcënuar se do të vendosë një tarifë prej 35% për të gjitha mallrat kanadeze që hyjnë në SHBA, nëse deri më 21 korrik nuk arrihet një marrëveshje e re tregtare mes dy vendeve.
Masa do të hyjë në fuqi më 1 gusht, sipas një letre të publikuar nga vetë Trump në platformën e tij “Truth Social”.
Letra drejtuar Kanadasë është pjesë e një serie me më shumë se 20 dokumente paralajmëruese të dërguara nga Trump ndaj partnerëve të rëndësishëm tregtarë të SHBA-së, si Japonia, Koreja e Jugut dhe Sri Lanka.
Për këto vende, ai ka propozuar tarifa të reja që variojnë nga 15% deri në 35%, si pjesë e një strategjie më të gjerë proteksioniste.
Në letrën drejtuar Otavës, Trump liston disa arsye për masat e mundshme ndëshkuese:
– Dështimi i Kanadasë për të ndaluar trafikun e fentanilit drejt SHBA-së
– Taksat që prekën eksportet e fermerëve amerikanë të qumështit
– Rritja e deficitit tregtar dypalësh
Sipas Trump, një mënyrë për të shmangur tarifat do të ishte që kompanitë kanadeze të zhvendosin prodhimin në SHBA. Ai theksoi gjithashtu se tarifat “mund të rishikohen në varësi të ecurisë së marrëdhënieve dypalëshe”.
Kryeministri i Kanadasë, Mark Carney, reagoi me tone të vendosura përmes rrjetit X, duke deklaruar se qeveria e tij do të mbrojë interesat e punëtorëve dhe kompanive kanadeze, por mbetet e hapur për një marrëveshje të drejtë me Uashingtonin.
Kërcënimi për tarifë vjen në një moment kur marrëdhëniet tregtare SHBA-Kanada janë sërish në vëmendjen e opinionit ndërkombëtar, me ndikim të mundshëm në tregjet e Amerikës së Veriut dhe më gjerë.
