Në konferencën e gjatë pas përfundimit të samitit të NATO-s, presidenti amerikan Donald Trump befas përmendi Kosovën dhe Serbinë, duke lënë të kuptohet se kohët e fundit është angazhuar për të shmangur një përplasje të mundshme mes dy vendeve.
Duke iu përgjigjur një pyetjeje mbi ambiciet territoriale të Vladimir Putinit dhe nëse ato shtrihen përtej Ukrainës, Trump tha se në javët e fundit administrata e tij ishte marrë me një sërë çështjesh globale, përfshirë tensionet mes Indisë dhe Pakistanit, konfliktin mes Kosovës dhe Serbisë, si dhe zhvillimet në Afrikë. Ai përmendi se të premten do të priste zyrtarë nga Kongo në Shtëpinë e Bardhë.
Pa dhënë shumë detaje, Trump nënvizoi se këto angazhime kanë qenë të rëndësishme për ruajtjen e paqes në disa zona të tensionuara.
Në një moment tjetër të konferencës, kur u pyet për vështirësitë në zgjidhjen e konflikteve ndërkombëtare, ai tha: “Shiko, sapo i dhamë fund një lufte që kishte 30 vite që ziente, në vetëm 12 ditë. E zgjidhëm çështjen mes Ruandës dhe Kongos, të cilët do të firmosin një marrëveshje në Shtëpinë e Bardhë këtë të premte. Ndaluam edhe Serbinë, që ishte gati të niste një përplasje.”
Edhe pse nuk e përmendi qartazi Kosovën në këtë deklaratë të dytë, konteksti sugjeron se ai i referohej krizës së tensionuar mes dy vendeve të Ballkanit, për të cilën nuk dha më shumë hollësi.
