Presidenti i SHBA-së, Donald Trump, ka reaguar menjëherë pas një bisede telefonike dy-orëshe me presidentin rus Vladimir Putin, duke deklaruar se komunikimi mes tyre ishte “shumë i mirë” dhe se Rusia e Ukraina pritet të nisin menjëherë negociatat për një armëpushim dhe fundin e luftës.
Në një postim në rrjetin e tij social, Truth Social, Trump tha se kushtet e armëpushimit do të përcaktohen nga vetë palët ndërluftuese, pasi “vetëm ato njohin detajet që nuk mund t’i dijë askush tjetër”.
Ai e përshkroi tonin e bisedës me Putinin si “shumë pozitiv”, duke shtuar se në rast të kundërt “do ta kishte thënë menjëherë”.
Trump pohoi se Rusia shprehu gatishmëri për të zhvilluar marrëdhënie të forta tregtare me SHBA-në pas përfundimit të konfliktit, duke nënvizuar potencialin e madh ekonomik të vendit dhe përfitimet që mund të sjellë kjo edhe për Ukrainën në fazën e rindërtimit.
Presidenti amerikan tha se ka informuar për këtë zhvillim liderët kryesorë europianë, mes tyre Zelenskyy, Ursula von der Leyen, Macron, Meloni, Merz dhe Stubb, menjëherë pas telefonatës me Putinin.
Ai përmendi gjithashtu interesimin e Vatikanit për të pritur negociatat, duke e mbyllur me thirrjen: “Le të fillojë procesi”.
