Një tërmet i fuqishëm ka goditur Haitin të shtunën, duke bërë që njerëzit të largohen të frikësuar nga shtëpitë e tyre, të cilat mund të shemben. Tërmeti me magnitudë 7.2 ballë u ndje 8 km nga qyteti Petit Trou de Nippes, rreth 150 km në perëndim të kryeqytetit Port-au-Prince, në një thellësi prej 10 km, rreth orës 08:30 të mëngjesit me kohën lokale, bëri me dije Shërbimi Gjeologjik Amerikan.
Tërmeti, i cili u ndje në të gjithë Karaibet, përfshirë Kubën dhe Xhamajkën, vjen pak më shumë se një muaj pasi presidenti i Haitit, Jovenel Moïse u vra në rezidencën e tij në Port-au-Prince.
Vendi është ende duke u rimëkëmbur nga një tërmet 7 ballësh që ndodhi më afër kryeqytetit 11 vjet më parë dhe që vrau qindra mijëra njerëz dhe rrafshoi pjesë të ndërtesave, duke lënë shumë të pastrehë. Më shumë se 200,000 njerëz vlerësohet se kanë vdekur pas tërmetit shkatërrues me magnitudë 7.0 që goditi Haitin në vitin 2010 dhe rrafshoi pjesën më të madhe të kryeqytetit bregdetar të vendit.
“Të gjithë kanë vërtet frikë. Kanë kaluar vite që nga një tërmet kaq i madh”, tha Daniel Ross, një banor në qytetin lindor kubanez të Guantanamos, duke shtuar se shtëpia e tij qëndronte e fortë, por mobiljet u drodhën.
