Një ngjarje e rëndë ka tronditur mëngjesin e sotëm në Durrës. Është vrar me armë zjarri një burrë 40 vjeçar në afërsi të Drejtorisë Arsimore.
Bëhet fjalë për viktimën , Edmond Koçi, banues në këtë qytet.
Pas vrasjes me armë zjarri, disa minuta më pas forcat policore kanë gjetur një mjet tip “Benz” të djegur me targa të vjedhura, që dyshohet se është përdorur nga autorët.
Deri tani nuk janë identifikuar ende autorët e vrasjes dhe nuk dihen as shkaqet e ngjarjes.
Viktima, i njohur ndryshe si Mond Çekiçi, ka qenë pjesëtar i grupit të bandës kriminale të Lul Berishë.
Policia ka rrethuar zonën, janë ngritur pika kontrolli, dhe vijojnë kontrollet e imtësishme në gjithë zonën.
Dinamika e ngjarjes:
Viktima udhëtonte me mjet me shofer dhe një automjet tjetër i ka prerë rrugën. Mësohet se nga mjeti ka dalë shoferi i viktimës për të pyetur se çfarë kishte, ndërkohë që një nga personat ne mjetin tjetër ka qëlluar për vdekje Edmondin.
Fill pas kësaj, ata janë larguar me një mjet tip ‘Benz’ me targa të vjedhura në Tirane, i cili është braktisur dhe djegur nga autoret në Katund Sukth, Durrës.
Njoftimi i policisë:
Më datë 20.03.2021, rreth orës 08:40, në lagjen nr.16, Durrës, në rrethana ende të paqarta është qëlluar me armë zjarri e për pasojë ka mbetur i vrarë shtetasi E. K., rreth 40 vjeç.
Menjëherë forca të shumta Policie kanë shkuar në vendngjarje dhe kanë rrethuar zonën ku vijon krehja e zonës për kapjen e autorëve.
Janë ngritur pika kontrolli në të gjitha akset rrugore në hyrje e në dalje të Durrësit si dhe në drejtim të Tiranës e Kavajës.
Grupi hetimor ndodhet në vendngjarje dhe nën drejtimin e Prokurorisë vijon puna për sqarimin dhe zbardhjen e rrethanave të ngjarjes për të bërë të mundur identifikimin kapjen e autorëve.
