Administrata Tatimore ka paralajmëruar të gjithë personat dhe subjektet që shesin produkte apo shërbime përmes internetit se duhet të regjistrohen pranë Qendrës Kombëtare të Biznesit përpara nisjes së aktivitetit.
Sipas Tatimeve, tregtia online trajtohet njësoj si çdo veprimtari tjetër ekonomike dhe nuk mund të ushtrohet në mënyrë informale. Personat fizikë, individët tregtarë, të vetëpunësuarit dhe entitetet që operojnë në internet kanë detyrim të publikojnë në faqen e tyre numrin e NIPT-it, emrin e subjektit tregtar, adresën e selisë dhe numrin e telefonit.
Në rast se këto të dhëna mungojnë, Administrata Tatimore paralajmëron se do t’i kërkojë AKEP bllokimin e përkohshëm të faqes së internetit nga ku ushtrohet aktiviteti.
Institucioni thotë se bashkëpunimi me Autoritetin e Komunikimeve Elektronike dhe Postare është forcuar për të luftuar informalitetin në tregtinë online, sidomos ndaj subjekteve që shesin pa u regjistruar dhe pa deklaruar të ardhurat.
Tatimet u kërkojnë të gjithë personave që ushtrojnë ose synojnë të ushtrojnë tregti në internet të regjistrojnë aktivitetin, të publikojnë të dhënat e biznesit dhe të shlyejnë detyrimet tatimore përkatëse.
Detyrimet përfshijnë tatimin mbi të ardhurat, kontributet e sigurimeve, fiskalizimin dhe lëshimin e faturave, ndërsa regjistrimi në TVSH bëhet i detyrueshëm kur qarkullimi vjetor kalon 10 milionë lekë ose kur subjekti kryen importe, pavarësisht qarkullimit.
Në rast të mosrespektimit të këtyre kërkesave, Administrata Tatimore paralajmëron se do të aplikojë masat administrative të parashikuara nga ligji.
