Emigrantët shqiptarë nuk i ndalon Covid-19 të kthehen në Shqipëri për pushimet. Pavarësisht situatës së shkaktuar nga Covid-19, në 24 orët e fundit afro 3 mijë persona kanë hyrë në territorin shqiptar. Kështu, vetëm nga dogana e Kapshticës kanë hyrë në vendin tonë 1024 shtetas dhe 271 mjete.
Masat kufizuese të mbylljes kombëtare në Greqi mbeten në fuqi deri të enjten, datë 7 janar 2021, ora 6:00. Sipas autoriteteve greke,nga data 7 dhjetor, ora 06:00 deri në orën 22:00, do të lejohen të dalin nga Greqia dhe të hyjnë në Shqipëri nëpërmjet pikës së kalimit të Kapshticës, vetëm këmbësorët dhe mjetet e tonazhit të rëndë.
Lejohet kalimi i njerëzve, automjeteve, kamionëve në Kakavijë. Në rast kalimi, aplikohet vetëkarantinim i detyrueshëm një javor, pavarësisht shtetësisë dhe në rast shkelje, do të aplikohet gjobë prej 5000€. Orari i lëvizjes në Kakavijë është 7:00- 23:00 dhe vetëm 750 persona lejohen të kalojnë në ditë.
Përveç paraqitjes së testit negativ PCR të kryer deri në 72 orë më parë, do të kryejnë edhe rapid test. Kjo përfshin mbërritjet ajrore dhe tokësore në Greqi. Fëmijët nën 10 vjeç nuk i nënshtrohen detyrimit për një test PCR.
Ndërkohë, në doganën e Qafë Thanës kanë hyrë 1849 shtetas. Pritet që në ditët në vazhdim ky numër të rritet dhe më shumë. Për shkak të masave që kanë marrë shtete të caktuara si pasojë e pandemisë së Covid-19, numri i emigrantëve nuk pritet të jetë më i lartë se i atyre që erdhën në vendin tonë vitin e kaluar.
/Gazetareforma.com/
