Ditën e sotme Presidenti i Kazakistanit tha në një fjalim televiziv se ai ka autorizuar forcat e sigurisë të vendit të “qëllojnë për të vrarë pa paralajmërim”, pasi ai kërkon t’i japë fund protestave antiqeveritare.
Presidenti Kassym-Jomart Tokayev tha se ishte “marrëzi” të negociosh me protestuesit të cilët ai i përshkroi si “kriminelë dhe vrasës”.
Udhëheqësi kazak tha se trupat paqeruajtëse ruse ishin në vend me kërkesën e tij mbi një bazë të përkohshme për të garantuar sigurinë.
Më herët të premten, presidenti tha në një deklaratë se rendi kushtetues ishte rivendosur kryesisht pas trazirave njëjavore në vendin e Azisë Qendrore.
“Autoritetet lokale janë në kontroll të situatës. Por terroristët vazhdojnë të përdorin armë dhe të dëmtojnë pronat e qytetarëve. Prandaj, veprimet kundër-terroriste duhet të vazhdojnë derisa militantët të eliminohen plotësisht”, thuhet në deklaratën e presidentit.
Reuters raportoi se të shtënat me armë zjarri mund të dëgjoheshin ende të premten në mëngjes në Almaty, qyteti më i madh i vendit.
Ministria e Brendshme e Kazakistanit tha në një deklaratë të premten se 26 “kriminelë të armatosur” u “likuiduan”, ndërsa më shumë se 3,000 ishin arrestuar. Ministria tha gjithashtu se 18 pjesëtarë të policisë dhe gardës kombëtare ishin vrarë që nga fillimi i protestave.
Demonstratat nisën në fund të javës së kaluar në pjesën perëndimore të vendit në shenjë proteste ndaj dyfishimit të çmimeve të karburanteve. Por për shkak se ato janë përhapur në të gjithë vendin kaq shpejt dhe janë rritur kaq shumë, disa vëzhgues politikë po sugjerojnë se ato pasqyrojnë pakënaqësi më të gjerë në vendin që ka jetuar nën autoritarizëm që nga fitimi i pavarësisë nga Bashkimi Sovjetik në 1991./përkthyer nga Euronews
