Gjykata e Apelit të Vlorës ka ndryshuar masën e sigurisë për zv. kapitenin e anijes “St-Damian”, brenda të cilës u gjetën 15 fuçi të dyshuara me lëndë kimike të rrezikshme.
Ndaj Kujtim Xhaferllarit Gjykata e Vlorës caktoi masën e sigurisë “Arrest me burg” për një periudhë dy mujore, por Apeli e zbuti masën në “Arrest shtëpiak”.
Apeli la në arrest shtëpie edhe Zamir Kormuzin, administratorin e kompanisë së mbetjeve, shkruan “Shqiptarja.com”.
I vetmi që është lënë në burg, është shoferi i furgonit, Arbër Çuni, i cili kryente transportin e mbetjeve nga anija te pika e grumbullimit të mbeturinave.
Ndërkohë nuk ka ndryshim mase sigurie për Agron Bratajn, Elisabeta Çunin dhe Festim Tafën.
Të gjashtë këta persona u arrestuan pas akuzave për transportin e mbetjeve të dyshuara të rrezikshme nga Italia në Shqipëri.
Bazuar në hetimin e prokurorisë, trageti “St-Damian” ka sjellë në Shqipëri materiale si leshi i xhamit, sfungjerë dhe inerte të dala nga një projekt rikonstruksioni në Itali.
Mbetjet e dyshuara të rrezikshme ishin vendosur nëpër enë të mbështjella me një letër të verdhë, që mbante sipër logon e një firme italiane të quajtur “Eni”.
Më pas ato ishin vendosur në disa fuçi të mëdha e të zeza, të cilat po ashtu ishin me logon e verdhë “Eni”.
Materialet merreshin nga Arbër Çuni, i cili pasi i nxirrte nga hambari i tragetit i çonte në pikën e grumbullimit që zotëronte në Vlorë.
Nga hetimi rezulton gjithashtu se komapnia “Delfini1” dhe agjencia “Eruoferris” me përfaqësues Agron Brataj, kishin lidhur kontratë pastrimi, për shërbimin e tërheqjes së mbeturinave, midis të cilëve ishte edhe trageti “St-Damian”.
Më tej në dosjen e prokurorisë thuhet se sasia e mbetjeve prej 40 metër kub lesh xhami dhe 15 fuçi me lëndë të dyshuara të rrezikshme, janë sekuestruar brenda tragetit “St-Damian”.
Më pas mbeturinat ngarkoheshin në furgonin e Arbër Çuni, të cilat nxirreshin nga trageti pa dokumentacionin përkatës.
.“…shkarkimi i këtyre mbetjeve dhe më tej depozitimi i tyre në pikën e grumbullimit të mbetjeve tek Zamir Kormuzi, është kryer pa njoftuar më parë asnjë prej institucioneve shtetërore…”,thuhet në dosjen e akuzës së Vlorës.
Gjatë kontrolleve në pikën e grumbullit në pronësi të Zamir Kormuzit, janë gjetur mbetje të ngjashme me ato të bllokuara në target.
Ndërkohë firma “Kormuzi” në licencën në QKR, nuk ka asnjë objekt të veprimtarisë së trajtimit të këtyre materialeve.
