Policia e Korçës ka arrestuar ditën e sotme 4 persona të cilët po tentonin që të transportonin emigrantë të paligjshëm në këmbim të parave.
Mësohet falë operacionit policor të koduar “Perimetri”, strukturat për Hetimin e Krimeve në Drejtorinë Vendore të Policisë Korçë, në bashkëpunim me Policinë Kufitare, Sektorin e Policisë Rrugore dhe Komisariatin e Policisë Pogradec kanë arrestuar 23 vjeçarin Kristi Ndoja, dhe 20 vjeçarin Xhoniel Qelemeni, banues në Korçë, të cilët janë kapur në lagjen nr. 3, Pogradec, duke transportuar me mjetin tip “Benz”, dy emigrantë të paligjshëm të cilëve kundrejt fitimit iu kishin premtuar kalimin drejt vendeve të BE-së.
Gjatë ndjekjes, këta shtetas nuk iu bindën urdhrit të punonjësve të policisë për të ndaluar, por u kapën dhe prangosën.
Në aksin rrugor Korçë-Pogradec, në afërsi të fshatit Çërravë, u kap 46 vjeçari me iniciale Melsi Kapedani, duke transportuar me mjetin e tij tip “Mazda”, tre emigrantë të paligjshëm, të cilëve kundrejt fitimit iu kishte premtuar kalimin drejt vendeve të BE-së.
Gjithashtu u bë ndalimi i të shpallurit në kërkim, Andrea Thanasi, 49 vjeç, banues në Durrës, i cili më datë 10.09.2020, nuk i është bindur urdhrit të punonjësve të policisë për të ndaluar dhe ka braktisur mjetin tip “Ford Transit” në afërsi të fshatit Hudënisht, Pogradec, me të cilin po transportonte kundrejt fitimit gjashtë emigrantë të paligjshëm.
Materialet i kaluan Prokurorisë të Rrethit Gjyqësor Pogradec për veprat penale “Ndihma për kalim të paligjshëm të kufijve, kryer në bashkëpunim” dhe “Mosbindja ndaj urdhrit të punonjësit të policisë së rendit publik”.
