Aksidentet e urbanëve nuk kanë të ndalur!
Paraditen e sotme, autobusi i linjës Kombinat-Kinostudio është përplasur me një kosh mbeturinash. Theksojmë se ngjarja ka ndodhur pranë zonës së ‘Misto Mames’.
Fatmirësisht nga përplasja nuk ka pasagjerë të lënduar, por vetëm dëme materiale. Siç shihet dhe nga fotoja, autobusi ka devijuar sipër trafik ndarëse.
Vlen të theksojmë se një numër i konsiderueshëm aksidentesh urbanësh kanë ndodhur kohët e fundit, fakt i cili adreson fajin tek drejtuesit e mjetit, të cilët vazhdojnë të tregojnë nivele skandaloze përgjegjësie. Bashkia duhet të ndërmarrë hapa konkretë për këtë “lathitje” të urbanëve, njëherë duke “kapërcyer” lumin e Lanës e herë të tjera duke goditur fuqishëm stacione autobusi apo koshe mbeturinash.
Urbanët janë mjete transporti që përdoren masivisht nga qytetarët në vend, të cilët janë të rrezikuar për jetën pothuajse çdo ditë. Tirana, kryeqyteti që tenton të “kopjojë” modele zhvillimi shabllon, ka një transport urban që po kthehet në ‘horror’.
Njoftimi i policisë:
Tiranë/Informacion paraprak
Më datë 16.05.2022, në Misto Mame, shtetasi S. Sh., duke drejtuar autobusin e linjës së Kombibatit, dyshohet se ka humbur kontrollin mbi drejtimin se tij dhe është përplasur me një kosh mbeturinash.
Si pasojë ka vetëm dëme materiale.
Grupi hetimor ndodhet në vendngjarje dhe po punon për sqarimin e rrethanave të aksidentit. /Gazeta Reforma
