Një aksident tragjik ka ndodhur rreth orës 02:00 të mëngjesit të sotëm në Bullgari, ku nga përplasja e një autobusi kanë ndërruar jetë 45 shqiptarë nga Maqedonia e Veriut.
Sipas mediave maqedonase mes viktimave janë edhe 12 fëmijë, dy prej të cilëve binjakë, konfirmuar nga drejtori i Policisë Kombëtare të Bullgarisë, Staniir Stanev.
Shefi i policisë kombëtare të Bullgarisë tha se dy drejtuesit e autobusit ishin maqedonas, ndërsa pasagjerët ishin shqiptarë.
Nga informacionet paraprake të hetimit fillestar, dyshohet se shkaqet e këtij aksidenti me përmasa tragjike janë një defekt teknik i autobusit dhe përgjumja e shoferit, ku fillimisht autobusi është përplasur dhe më pas ka marrë flakë. Nga gjithë ky aksident kanë mbijetuar 7 persona, të cilët janë dërguar në spitalin Pirogov në Sofje.
Ndërkohë një zyrtar nga një spital i urgjencës në Sofje tha se shtatë personat që po trajtoheshin ishin hedhur nga autobusi që digjej.
Sipas raportimeve, autobusi ishte i mbushur më së shumti me shtetas nga Maqedonia e Veriut. Besohet se autobusi është përplasur e më pas është përfshirë nga flakët, e pikërisht kjo është bërë shkaku i ngjarjes tragjike. Ushtruesi i detyrës së Ministrit të Brendshëm, Stefan Yanev, është parë në vendin e ngjarjes.
Si rezultat i veprimeve të tyre të shpejta, shtatë persona janë transportuar në spital për mjekim. Po kryhet një inspektim. Qarkullimi është ndërprerë në të dy drejtimet. Një organizim i përkohshëm për lëvizje përmes p.v. Dolna Dikanya dhe p.v. Daskalovo”, thuhet në njoftimin e Ministrisë.
Kryeministri maqedonas Zoran Zaev, zëvendëskryeministri Bujar Osmani dhe ministri i Shëndetësisë Venko Filipçe tashmë po udhëtojnë për në Bullgari, konfirmoi agjencia shtetërore maqedonase e lajmeve MIA.
