Kuvendi i Shqipërisë e ka nisur seancën e sotme me 1 minutë heshtje për tragjedinë shqiptare në Bullgari. Kryetarja e Parlamentit Lindita Nikolla ka kërkuar nga deputetët nderimin me 1 minutë heshtje të 45 viktimave të aksidentit tragjik në Bullgari.
Dy ditë më parë një autobus i Maqedonisë së Veriut u aksidentua dhe më pas u dogj në Bullgari teksa kthehej nga Stambolli. 45 persona gjetën vdekjen.
Ndërkohë në Bullgari vijojnë hetimet për të zbuluar shkaqet e e aksidentit tragjik dy ditë më parë, ku humbën jetën 45 shqiptarë të Maqedonisë së Veriut dhe u plagosën 7 të tjerë, por nuk ka ende një përfundim konkret mbi atë se çfarë shkaktoi ngjarjen e rëndë. Mediat vendase hedhin dyshime se në autobus kishte 1 mijë litra naftë dhe 30 mijë fishekzjarrë që do të hidheshin në tregun vendas për festat e fundvitit.
Sipas Drejtorit Ekzekutiv të Administratës së Automjeteve, Bojko Ranovski, autobusi kishte hyrë në Bullgari në orën 21:15 dhe koha prej 5 orësh për kalimin e rreth 320 kilometrave rrugë është normal, pra në një mënyrë bie poshtë hipoteza se automjeti po lëvizte me shumë shpejtësi. Ranovski u shpreh se po hetohet për të kuptuar nëse shoferët i kanë ndërruar vendet në pushimin e fundit, që ka qenë rreth 30 kilometra para vendit të përplasjes. Ai thekson se me rëndësi është të vërtetohet nëse zjarri, që i mori jetën 45 personave, ndodhi para apo pa aksidentit.
