Presidenti i Shqipërisë, Ilir Meta, ka reaguar për aksidentin tragjik të ndodhur mëngjesin e sotëm në Vlorë, ku humbën jetën katër anëtarë të një familje që po udhëtonin me makinë “Toyota”. Kreu shtetit ka shprehur ngushëllimet e tij, teksa thotë se kjo tragjedi e ka tronditur.
Meta kërkon hetim të plotë të ngjarjes dhe i bën thirrje Policisë së Shtetit të marrin të gjitha masat efektive, në mënyrë që ngjarje të tilla me pasojë vdekjen, të mos përsëriten më. Gjithashtu, Meta ka një apel edhe për qytetarët, që të shmangin shpejtësinë dhe të udhëtojnë me kujdes.
Reagimi i plotë i presidentit Ilir Meta.
“Kam përcjellë me trishtim shumë të thellë lajmin e rëndë të humbjes së familjes Gushi në një aksident tragjik në aksin rrugor Fier-Vlorë. I bashkohem dhimbjes së të afërmve dhe ju shpreh ngushëllimet më të ndjera!
Zoti t’ju japë forcë për të përballuar këtë tragjedi, që na ka tronditur sot të gjithëve. Duke kërkuar një hetim të plotë, i apeloj Policisë Rrugore dhe çdo strukture tjetër përgjegjëse, të marrin të gjitha masat efektive për të parandaluar të tilla tragjedi, sidomos në këtë periudhë të ngarkuar të sezonit turistik. Ju bëj thirrje të gjithë qytetarëve të udhëtojnë me shumë kujdes! Shpejtësia vret!”, ishte reagimi i Metës.
