Numri i viktimave nga shembja e çatisë së klubit të natës “Jet Set” në Santo Domingo është rritur në 234.
Viktima më e fundit është një grua 33-vjeçare, e cila ndërroi jetë pas 46 ditësh trajtimi në kujdesin intensiv. Ajo kishte pësuar dëmtime të rënda në shpinë dhe nuk arriti të mbijetojë, sipas spitalit ku po trajtohej.
Shembja ndodhi mbrëmjen e 8 prillit dhe konsiderohet si tragjedia më e rëndë në një shekull në Republikën Dominikane.
Mes viktimave ishte edhe këngëtari i njohur i merenges, Ruby Perez, i cili ndodhej në skenë në momentin e ngjarjes.
Deri më tani, janë ngritur 52 padi civile në gjykatat dominikane ndaj menaxherëve dhe pronarëve të klubit, por ende nuk ka filluar ndonjë ndjekje penale.
Ekspertët besojnë se katastrofa është shkaktuar nga një kombinim faktorësh, mbingarkesa e çatisë me pajisje të rënda ventilimi dhe kondicionimi, dobësimi i strukturës për shkak të lagështisë dhe dridhjeve të vazhdueshme nga muzika dhe vallëzimi, si dhe mungesa e kontrolleve teknike dhe mirëmbajtjes.
