Një natë argëtimi u kthye në një skenë tragjike në diskotekën e Koçanit, ku flakët shuan jetën e disa personave të njohur, mes tyre futbollisti i Shkupit, Andrej Lazarov, drejtori i Qendrës Kulturore të Shtipit, Filip Stevanovski, dhe muzikanti Gorgi Gorgiev.
Humbja e futbollistit të Shkupit, Andrej Lazarov
Futbollisti 25-vjeçar, Andrej Lazarov, nuk i mbijetoi tragjedisë, duke ndërruar jetë në spital mëngjesin e sotëm. Megjithëse nuk pësoi djegie të rënda, ai thithi një sasi të madhe tymi, çka rezultoi fatale. Lazarov kishte luajtur për disa skuadra të njohura, përfshirë Metalurgun, Rabotniçkin, Tikveshin, Rudesin, Goricën dhe Shkupin.
Drejtori i Qendrës Kulturore të Shtipit mes viktimave
Një tjetër viktimë e tragjedisë është Filip Stevanovski, drejtori i Qendrës Kulturore të Shtipit. Ai ishte një muzikant i diplomuar në xhaz dhe drejtonte Festivalin e Këngës për Fëmijë “Veselo Šturče”.
Humbja e muzikantit të njohur nga Strumica
Muzikanti i njohur Gorgi Gorgiev nga Strumica ishte një tjetër viktimë e flakëve vdekjeprurëse. Lajmin e trishtë e konfirmoi kryetari i Komunës së Strumicës, Kostadin Kostadinov, i cili e kujtoi me dhimbje të madhe muzikantin e talentuar:
“Oh, fëmijë i bukur, ne kërkuam të gjitha listat, të gjitha spitalet, për të të gjetur, vetëm për të na thënë se ishe këtu… Me pikëllim të pamasë mora lajmin për humbjen tragjike të bashkëqytetarit tonë Gorgi Gorgiev, i cili humbi jetën në zjarrin e tmerrshëm në Koçan. Strumica humbi një muzikant të talentuar, mik dhe njeri me zemër të madhe, i cili me muzikën e tij shpërndau gëzim dhe emocione.”
Ai përfundoi mesazhin e tij me një homazh për muzikantin e ndjerë, duke thënë se muzika dhe kujtimi i tij do të mbeten të paharrueshme në zemrat e njerëzve.
Tragjedia në diskotekën e Koçanit ka tronditur të gjithë vendin, ndërsa autoritetet po hetojnë shkaqet e zjarrit që i mori jetën këtyre njerëzve të dashur dhe të talentuar.
