Një tjetër dramë njerëzore ka goditur familjet e viktimave të aksidentit ajror të Air India, ku më 12 qershor një avion Boeing 787 Dreamliner u rrëzua gjatë ngritjes nga aeroporti i Ahmedabadit në Indi, duke shkaktuar vdekjen e 241 pasagjerëve, përfshirë 52 shtetas britanikë.
Situata është përkeqësuar edhe më tej, pasi të paktën dy familje britanike kanë marrë trupat e gabuar të viktimave.
Denoncimi është bërë nga avokati James Healy-Pratt, përfaqësues i 20 familjeve angleze, të cilët humbën të afërmit e tyre në këtë tragjedi.
Sipas tij, autoritetet indiane kanë kryer gabime serioze gjatë procesit të identifikimit të viktimave, të zbuluara më vonë nga analizat e ADN-së të kryera në Mbretërinë e Bashkuar.
“Nuk bëhet fjalë për një çështje thjesht teknike, por për një plagë të re që po u hapet familjeve tashmë të shkatërruara nga dhimbja,” tha Healy Pratt.
Gazeta britanike Daily Mail raportoi për disa raste tronditëse, ku trupat e kthyer në Britani rezultuan të ishin të pasagjerëve të tjerë, ose mbetjet mortore të përziera.
Në një rast, një familje u njoftua vetëm pak para funeralit se arkivoli nuk përmbante trupin e të afërmit të tyre. Në një tjetër, në arkivol u gjetën mbetje të dy personave të ndryshëm, duke sjellë tronditje të thellë.
Qeveria indiane ka reaguar nëpërmjet zëdhënësit të Ministrisë së Jashtme, Randhir Jaiswal, duke deklaruar se janë në bashkëpunim me autoritetet britanike për të zgjidhur situatën.
Nga ana tjetër, pala britanike theksoi se procesi i identifikimit është nën juridiksionin indian dhe përballet me vështirësi të jashtëzakonshme, për shkak të natyrës shkatërrimtare të aksidentit, ku vetëm një person mbijetoi, ndërsa numri i viktimave shkoi mbi 260.
Avokati Healy-Pratt njoftoi se kjo çështje pritet të diskutohet edhe gjatë takimit mes kryeministrit britanik Keir Starmer dhe homologut indian Narendra Modi, i cili ndodhet në Londër për të firmosur një marrëveshje të re tregtare.
