Një ngjarje e rëndë familjare ka tronditur qytetin e Trentos në veri të Italisë, ku një 19-vjeçar vrau të atin, 46 vjeç, duke e goditur me thikë.
Sipas raportimeve nga mediat italiane, i riu ka ndërmarrë këtë veprim ekstrem për të mbrojtur nënën e tij, e cila dyshohet se ishte abuzuar për një kohë të gjatë nga bashkëshorti.
“Nuk pata zgjidhje tjetër. E godita me thikë sepse nuk ndalonte së keqtrajtuari nënën time. Më pas tentova ta shpëtoja, por ishte e pamundur. Njoftova menjëherë policinë”, është shprehur 19-vjeçari përpara prokurorëve.
Ai ka qëndruar pranë trupit të pajetë të të atit deri në mbërritjen e policisë dhe më pas është shoqëruar në paraburgim. Familja ka origjinë boshnjake dhe ishte e integruar në komunitet, ndërsa fqinjët thonë se nuk kishin vënë re asnjë shenjë tensioni.
Ngjarja ngjason me rastin e Alex Kotoia-s, i cili në vitin 2020 vrau të atin për të mbrojtur nënën e tij nga dhuna e vazhdueshme. Ai u shpall më vonë i pafajshëm nga Gjykata e Apelit në Torino dhe zgjodhi të mbante mbiemrin e nënës.
