Një ngjarje e rëndë është shënuar në shtetin malor të Indisë, Himachal Pradesh. Si pasojë e një rrëshqitje dheu nga Himalajet, kanë mbetur të vdekur të paktën 10 persona dhe janë plagosur të paktën 14 të tjerë, ndërsa me dhjetra kanë mbetur të bllokuar. Personat e plagosur kanë pësuar lëndime, por pas mjekimit pritet që të jenë më mirë.
Këtë të mërkurë, gurë të mëdhenj ranë në një autostradë kryesore, duke shkatërruar dhe duke yënë poshtë disa automjete, thanë autoritetet. Të paktën rreth 30 persona mbeten ende të bllokuar, ndër to edhe udhëtarët e një autobusi që gjendet nën rrënoja, ka thënë për agjencinë e lajmeve Reuters Vivek Kumar Pandey, një zëdhënës i policisë paramilitare Indo -Tibetiane të Policisë Kufitare
“Ka pasur një rrëshqitje masive toke në autostradën Reckong Peo-Shimla”, tha Pandey, duke shtuar më vonë se operacionet janë duke u zhvilluar, dhe se forcat e shpëtimit po përpiqen të arrijnë autobusin. Abid Hussain Sadiq, një zyrtar i lartë qeveritar në rrethin Kinnaur ku ndodhi incidenti, tha se operacionet e shpëtimit mund të vazhdojnë gjatë gjithë natës në një përpjekje për të gjetur të mbijetuarit. Më shumë se 200 forca, përfshirë ushtrinë, forcat paramilitare dhe policinë vendase, po punojnë përgjatë një pjese të Autostradës Kombëtare.
