Futbolli ështe tronditur nga një lajm i rëndë. Futbollisti i ri Fatjon Bunjaku ka humbur jetën në moshën 22-vjeçare pas një aksidenti rrugor të ndodhur pas mesnatës në aksin Prishtinë – Mitrovicë.
Bunjaku, i cili aktivizohej si sulmues me AF Elbasanin, ndërroi jetë tragjikisht duke lënë pas dhimbje të madhe te familjarët, miqtë, bashkëlojtarët dhe komuniteti sportiv në të dyja vendet.
Përmes një reagimi zyrtar, AF Elbasani ka shprehur ngushëllimet për ndarjen e parakohshme nga jeta të futbollistit, duke theksuar se klubi ka humbur më shumë sesa një lojtar.
“Sot, familja e madhe e klubit tonë humbi jo vetëm një lojtar, por një njeri që mbajti me krenari ngjyrat e klubit dhe la kontributin e tij në historinë tonë. Në këto momente të vështira, mendimet dhe lutjet tona janë me familjen Bunjaku, miqtë dhe të gjithë ata që patën fatin ta njohin dhe ta duan Fatjonin”, thuhet në mesazhin e klubit.
Gjatë karrierës së tij, Fatjon Bunjaku ishte pjesë e disa skuadrave të njohura në Kosovë dhe konsiderohej një futbollist me të ardhme premtuese. Ai kishte veshur gjithashtu fanellën e përfaqësueses U-21 të Kosovës, ku kishte spikatur si një nga talentet e brezit të tij.
Lajmi për vdekjen e 22-vjeçarit ka shkaktuar reagime të shumta në rrjetet sociale, ku klube, tifozë dhe figura të futbollit kanë shprehur ngushëllimet dhe dhimbjen për humbjen e tij të parakohshme.
Ndarja nga jeta e Fatjon Bunjakut përbën një humbje të rëndë për sportin shqiptar dhe kosovar, duke ndërprerë tragjikisht rrugëtimin e një futbollisti të ri që konsiderohej me perspektivë për të ardhmen.
