Një tragjedi ka ndodhur në alpet italiane, konkretisht në vendpushimin turistik të Marmoladas. Një masiv akulli është shkrirë dhë është shkëputur rishtazi prej faqes së malit, duke lënë të vdekur gjashtë alpinistë.
Ndërkohë sipas deklaratave të marra nga grupet e shpëtimit, kufomat nuk janë nxjerrë ende nga masa e akullit, pasi janë shtyrë poshtë majës së malit ku po bënin ngjitjen dhe është tepër e vështirë ndërhyrja.
Por mediat italiane raportojnë se të plagosur kanë mbetur edhe tetë persona të tjerë, përfshirë një që është në gjendje të rëndë, ndërsa ka edhe disa të zhdukur. Shkëputja e masivit të akullit ndodhi në seksionin midis “Pian dei Fiaçoni” dhe “Punta Penia”, përgjatë rrugës normale që të çon në majë të malit.
“Një gjëmimë, pastaj orteku. Dëgjuam një zhurmë të madhe, tipike për rrëshqitje dheu, më pas pamë një lloj orteku të përbërë nga bora dhe akulli që zbriste me shpejtësi të madhe dhe prej andej kuptova se kishte ndodhur diçka e rëndë. Me dylbi nga këtu shihet thyerja e akullit”, u shpreh një nga menaxherët e vendpushimit Castiglioni Marmolada, dëshmitar i të gjithë skenës.
Ndërkohë, grupe njerëzish janë shoqëruar në rrjedhën e poshtme nga shpëtimtarët pas shembjes së masivit të akullit.
Situata është e rrezikshme sepse ekziston rreziku i shembjeve të mëtejshme, ndërsa një helikopter është i pajisur me zilen Reço, një pajisje që të lejon të kërkosh këdo në vështirësi në zona të hapura.
