Kryeministri Edi Rama pak ditë më parë deklaroi se masat kufizuese ndaj COVID-19, mund të lehtësohen javën e ardhshme, nëse kurba e infeksionit vjen në ulje.
Deklaratën e kryeministrit shumë qytetarë e kanë marrë për të mirëqenë dhe ditën e sotme është vënë re një gjallërim i lëvizjes së këmbësorëve dhe i automjeteve në Tiranë.
Pavarësisht se ekspertët e ISHP janë shprehur se kjo javë është piku i epidemisë, vigjilenca është ulur te qytetarët kur ndërkohë kujdesi duhet të ishte edhe më i madh.
Nisur nga kjo situatë, “Iconstyle.al”, ka komunikuar me dr. Pëllumb Piperon, i cili e ka cilësuar tepër të rrezikshme këtë që po ndodh.
“Fakti që ka arritur piku, nuk do të thotë që nuk ka rrezik, por që rreziku tani është më i lartë! Do të thotë që numri i të prekurve është më i larti dhe piku nuk zgjat një ditë, mund të zgjasë dhe një javë.”- është shprehur dr. Pipero në një lidhje telefonike.
Më tej ai shtoi se vigjilenca në këtë kohë duhet të jetë maksimale, duke thënë: “Edhe pse kurba mund të duket e thyer, rreziku nuk ka kaluar.”
Fjalët e Piperos kanë qenë në përputhje me shifrat e publikuara sot nga Ministria e Shëndetësisë.
Në përditësimin e të dhënave, zv.Ministrja e Shëndetësisë, Mira Rakacolli bëri me dije se gjatë 24 orëve të fundit janë regjistruar 27 raste të reja, nga 112 testime të kryera, një nga shifrat më të larta, që nga nisja e epidemisë.
Këto të dhëna tregojnë se tashmë është momenti kur vigjilenca duhet të jetë më e lartë se kurrë, pasi jemi futur në javën e zjarrit, siç e quajnë ekspertët.
Deri në këto momente, në vendin tonë kanë ndërruar jetë 16 persona nga COVID-19, ndërsa numërohen edhe 89 të shëruar.
