Një ish-punonjëse e policisë shqiptare është vënë në prangat e policisë italiane pasi është kapur me lëndë narkotike e llojit kokainë.
Mediat fqinje thonë se policja e arrestuar është 29 vjeçe, por nuk bëjnë me dije identitetin e saj.
Gjatë momentin të arrestimit, ish-polices i është gjetur edhe një kartë pune, me të cilën verifikohej si punonjëse e policisë shqiptare.
Ndërkohë, gjatë aksionit, policia ka sekuestruar rreth 76 doza kokainë, të fshehura brenda makinës, ku udhëtonte 29-vjeçarja shqiptare, së bashku me një bashkëkombës.
Së bashku me lëndën narkotike, policia ka sekuestruar edhe rreth 1430 euro.
Ndërkohë, vetëm pak minuta pasi lajm është bërë publik, ka ardhur edhe reagimi nga Policia e Shtetit shqiptar.
Në deklaratën e saj, Policia e Shtetit sqaron se shtetësja me iniciale F.Z., nuk është më pjesë e policisë që prej vitit 2017.
Njoftimi i plotë i policisë
Në lidhje me një shtetase të arrestuar me lëndë narkotike nga autoritet policore italiane e cila është prezantuar si punonjëse e Policisë shqiptare sqarojmë opinionin publik se:
Shtetasja e arrestuar F. Z., 29 vjeçe nuk është më pjesë e Policisë së Shtetit që prej vitit 2017.
Ajo ka qenë efektive në Drejtorinë Vendore të Policisë Vlorë dhe në vitin 2017 është larguar nga Policia e Shtetit pasi nuk fitoi më të drejtën për tu pajisur me Çertifikatë Sigurie.
Policia e Shtetit ka shkëmbyer informacion në kohë reale me homologët e Karabinierisë në Milano, nëpërmjet Oficerit Ndërlidhës në Bari për rastin në fjalë.
Policia e Shtetit është e vendosur për të bashkëpunuar ngushtësisht me partnerët me qëllim evidentimin dhe goditjen e elementëve kriminal që ushtrojnë veprimtari kriminale.
