Gjykata italiane ka rikthyer në burg 5 vëllezërit shqiptarë Sallaku, të cilët u arrestuan nga policia e Breshias dhe Bergamos në nëntor të 2018-ës, pas një operacioni anti-drogë që u finalizua me arrestimin e 22 personave, italianë dhe shqiptarë.
Mes të arrestuarve ishte edhe presidenti i klubit Darfo Calcio, Gëzim Sallaku, një nga vëllezërit Sallaku.
Saimir, Gëzim (president i Darfo Calcio), Isuf, Gazmir dhe Taulant janë shqiptarët, ndaj të cilëve mëngjesin e djeshëm është lëshuar masa e arrestit, ndërkohë që për 2 gratë e tyre gjykata ka lëshuar masën e sigurisë “arrest shtëpie”.
Sipas ‘BresciaToday’, në vilën e tyre në Sale Marasino, biznesmenit Gëzim Sallaku iu gjetën 3 armë dhe municione. Pas arrestimit në nëntor ata u liruan, ndërsa në burg ngeli vetëm vëllai i tyre, Saimiri, i cili mori përsipër të gjitha përgjegjësitë.
Megjithatë pas hetimeve që janë zhvilluar nga Policia dhe falë disa përgjimeve, u zbulua se në të vërtetë të gjithë vëllezërit i njihnin armët, e bashkë me ta edhe dy nga gratë e familjes Sallaku.
Pas kësaj Gjykata lëshoi urdhër arresti dhe vendosi të rikthejë në burg shqiptarët. Vëllai i tyre, Saimir Sallaku ishte arrestuar më herët duke shitur një kilogramë kokainë tek dy tregtarë të njohur të drogës në Breshia.
Kur shqiptarët u arrestuan policia dyshonte se familja Sallaku kryente kontrabandë lëndësh narkotike duke kontrolluar shitjen në Bergamo dhe Parma.
