Policia e Durrësit ka arrestuar Saimir Gjepali 48 vjeç. Gjepali është një emër i njohur për policinë, për shkak të “përfshirjes” së tij në botën e krimit në zonën e Shijakut dhe Durrësit. Gjepali është një nga anëtarët e grupit të “Avdylajve”, pjesë e dosjes së hetimit me numër 339, buja e së cilës ka kaluar kufijtë shqiptarë. Edhe pse ndodhet i akuzuar për trafik droge, Gjykata e Durrësit dje e la me një tjetër masë sigurie, pasi juridikisht ishin shuar afatet kohore të hetimit.
Njoftimi i policisë:
Vijon puna për kapjen e personave në kërkim kombëtar dhe ndërkombëtar. Arrestohet me qëllim ekstradimi drejt Italisë, një shtetas i shpallur në kërkim ndërkombëtar, i dënuar me 24 vjet e 2 muaj burg. Specialistët për Hetimin e Narkotikëve dhe Trafiqeve të Paligjshme në DVP Durrës, në vijim të punës për kapjen e personave të shpallur në kërkim, bazuar dhe në informacionet e siguruara në rrugë operative, kanë bërë të mundur lokalizimin, kapjen dhe arrestimin e përkohshëm, me qëllim ekstradimi drejt Italisë, të shtetasit të shpallur në kërkim ndërkombëtar: Saimir Gjepali, 48 vjeç, banues në Shijak, Durrës. Këtë shtetas, Gjykata e Milanos, Itali, me vendimin e datës 24.02.2011, e ka dënuar me 24 vjet e 2 muaj burg për veprat penale “Pjesëmarrja në organizatë kriminale” dhe “Trafikimi i lëndëve narkotike”. Në bashkëpunim me autoritetet ligjzbatuese italiane vijon puna për ekstradimin e këtij shtetasi drejt Italisë.
