Një tjetër goditje ndaj krimit të organizuar është shënuar në Shkodër, ku Prokuroria e Posaçme ka zhvilluar një operacion të gjerë kundër një grupi të dyshuar për trafik ndërkombëtar droge.
Në total janë lëshuar 13 urdhër-arreste, ndërsa 8 persona janë vënë në pranga dhe 5 të tjerë janë shpallur në kërkim, përfshirë edhe ish-zyrtarë të Policisë së Shtetit.
Sipas burimeve nga hetimet, grupi dyshohet se ka trafikuar nga 850 deri në 1 ton drogë nga Amerika Latine drejt Evropës, përmes rrjeteve të mirëorganizuara dhe bashkëpunimit ndërkombëtar kriminal.
Në listën e të kërkuarve është edhe Erjon Dani, ish-efektiv i Komisariatit Nr. 3 në Tiranë, i larguar prej kohësh nga radhët e policisë, por që konsiderohet si një hallkë e rëndësishme në këtë skemë trafiku.
Operacioni ka nisur herët në mëngjes, rreth orës 05:00, i mbështetur mbi provat e siguruara nga dekriptimi i komunikimeve të koduara në platformën Sky ECC.
Këto të dhëna janë përdorur për të dokumentuar aktivitetin kriminal të grupit dhe për të çuar në identifikimin dhe ndalimin e pjesëtarëve të tij.
Përveç trafikimit të lëndëve narkotike, disa nga të dyshuarit përballen edhe me akuza për ushtrim të ndikimit të paligjshëm, duke theksuar lidhjet e mundshme mes elementëve të krimit të organizuar dhe zyrtarëve të rendit.
SPAK pritet të publikojë në vijim një njoftim të detajuar mbi rezultatet e këtij operacioni dhe hapat e ardhshëm në kuadër të hetimeve.
