Trafik droge dhe ekzekutime mafioze, ja tre emrat e rinj në listën e OFL

Operacioni Forca e Ligjit ka vijuar aksionin me tre emra të tjerë të botës së krimit.

Bëhet fjalë për Jani Alian, Florenc Tresën dhe Katan Bahojën.

Gjykata e Përmetit ka vendosur “Arrest me burg” për Jani Alian, për veprat penale “Prodhim dhe shitje narkotikësh”, “Vrasje me dashje e mbetur në tentativë”, “Armëmbajtje pa leje”.

Njëkohësisht Gjykata e Tiranës e ka dënuar me burgim të përjetshëm për “Vrasje me paramendim” dhe “Armëmbajtje pa leje”.

Vrasja më e bujshme që rëndon mbi Alian dhe grupin e tij kriminal, është ekzekutimi i Elton Çiços më 1 maj të 2016-ës.

Katan Bahoja ndërkohë është arrestuar nga autoritetet greke për “Trafik të lëndëve narkotike”.

Personi i tretë nën hetim është Florenc Tresa, i akuzuar për trafikimin e 8 tonëve drogë, e cila u kap nga policia e Napolit.

Për të Gjykata e Tiranës ka caktuar masën e sigurisë “Arrest me burg”.

Brenda 48 orëve, të tre personat e sipërpërmendur duhet të bëjnë deklarimin me shkrim të pasurisë.

Formularët e tyre do t’i dërgohen më pas SPAK për verifikim.